«Мен дәрігер болуды бала күнімнен армандап, медицина университетін аяқтадым. Бакалавр дипломым бар. Бірақ ақпараттық технологияларға, яғни ІТ саласына, мүлдем басқа бағытқа бет бұрып, қиын шешім қабылдадым. Оңай болған жоқ. Дегенмен қолымнан келді».

Бүгінгі кейіпкеріміз – Жадыра Қожамұратова. Ол – өзің қалаған іспен айналысу және білім алып, жаңа мамандықты меңгеруге ешқашан кеш емес деген ұстанымның дәлелі.

Жадыра Қожамұратова – 90-жылдардың соңында дүниеге келген қазақ қызы. Қарапайым отбасыдан шыққан бала мектеп кезінде дәрігер болып, адамдарға көмектесуді армандайды. Ол арманына жетеді.

Талдықорғанда дүниеге келіп, орта білімді сонда алдым. Туған қалам менің жан-жақты, ашық, саяхат сүйгіш, жаңалыққа ұмтылғыш, қайсар қыз етіп өсірді. Мектеп қабырғасында жүргенде медицинацаға қызығушылығым жоғары болады. Туған-туыс сұрағанда: өскенде дәрігер боламын деген балалардың бірі болдым. Сол арманның жетегімен Алматыдағы С.Асфендияров атындағы Қазақ ұлттық медицина университетіне түстім. Аман-есен аяқтап, дәрігер деген дипломымды алдым, – деп бастады әңгімесін Жадыра Қожамұратова.